PRISHTINË- Qendra Klinike Universitare të Kosovës (QKUK) ka njoftuar se është shtuar dukshëm numri i pacientëve që kërkojnë ndihmën mjekësore në kuadër të Qendrës Emergjente, si pasojë e aksidenteve në komunikacion.

“Bazuar në statistikat e Qendrës Emergjente, vetëm për një javë, ka pasur 129 raste, kur pacientët kanë kërkuar ndihmën e mjekut, si pasojë e aksidenteve”, thuhet në një komunikatë shtypi.

Krahas aksidenteve, po ashtu, është shtuar numri i pacientëve që kërkojnë ndihmën mjekësore.

Në bazë të dhënave nga Qendra Emergjente, për një javë janë trajtuar 1 070 pacientë, shifër kjo rekorde e trajtimit të pacientëve në kuadër të Qendrës Emergjente.

Qendra Emergjente e QKUK-së, për shkak të mbingarkesës së madhe, apelon tek qytetarët që mos ta ngarkojnë pa nevojë Qendrën Emergjente, por në raste joemergjente të drejtohen në qendrat e mjekësisë familjare dhe spitalet rajonale.
(m.a/express/BalkanWeb)