Me këtë rast, Presidenti Sejdiu tha se dekorimi i zonjës Pagarusha është një vlerësim për veprën kulminante në fushën e artit, në fushën e muzikës shqiptare dhe në fushën e një artisteje, e cila diti në mënyrën më të mirë të jetë shprehje e identitetit dhe e vlerave të një populli, në këtë rast e muzikës shqiptare, në gjithë repertorin e saj të begatë dhe të pafund.

“Ka këngë të Nexhmijes që rrallëkush ia mësynë t’i interpretojë për shkak të ritmit dhe fuqisë që kjo i ka dhënë këngës”, theksoi Presidenti Sejdiu, duke e vlerësuar veprën e saj si visar dhe krenari në gjithë opusin e përmbledhur aq mirë.

Ndërkaq, zonja Pagarusha duke e falënderuar Presidentin Sejdiu për vlerësimin e veprës së saj, tha se ndjehet shumë e lumtur dhe shprehu besimin se edhe artistët e tjerë të cilët e meritojnë do të jenë të vlerësuar në të ardhmen.

Qyteti i Durrësit përgatitet të presë për të tretin vit radhazi festivalin ndërkombëtar të filmit artistik. Është produksioni francez ”La vien en rose”, ai që do të çelë këtë aktivitet mbrëmjen e 29 gushtit.
Në Amfiteatrin Antik dhe në sallën e Pallatit të Kulturës do të shfaqen edhe filmat e tjerë konkurues, krijime të 17 regjisorëve, të huaj dhe shqiptarë. 10 filma artistikë konkurojnë për “Çmimin Gladiatori i Artë”, që është edhe trofeu i festivalit. Për herë të parë, Festivali i Filmit në Durrës prezanton çmimin për Studentin më të Mirë Shqiptar të Filmit me Metrazh të Shkurtër, një mundësi për studentët e filmit nga Shqipëria, Kosova, Mali Zi dhe Maqedonia. Një bashkëpunim i Bashkisë së Durrësit me Ministrinë e Turizmit, Kulturës, rinisë dhe Sporteve ky aktivitet synon kthimin e qytetit të Durrësit në një qendër kulturore, veçanërisht në stinën e verës.

LAS VEGAS- Jimena Navarrete është zgjedhur Miss Universi 2010 në edicionin e 59 të këtij konkurs bukurie ku morën pjesë 83 bukuroshe nga e gjithë bota. Spektakli u zhvillua mbrëmë në Las Vegas. Anxhela Martini përfaqësuesja e Shqipërisë u zgjodh ndër 15 finalistet e këtij spektakli, si dhe një ndër 10 femrat me trupin më të bukur në këtë ngjarje. Në vend të dytë u klasifikua Miss Xhamajka Yendi Phillipps, dhe në vend të tretë fitoi Miss Australia Jesinta Campbell.

Simbolet shqiptare surprizojnë Miss Universe. Pas Anxhela Martinit, e cila u shfaq të hënën me veshjen e Victoria’s Secret, ku në vend të krahëve të engjëjve ishin stiluar krahët e shqiponjës, edhe Kosova ka befasuar me elementët kombëtarë.

Bukuroshja Kështjalla Pepshi, e shpallur si Miss Kosova, ka pozuar në kategorinë e veshjeve kombëtare në Mandalay Bay Resort and Casino në Las Vegas, me përkrenaren e Skënderbeut dhe skeptër. Elementët e forta kombëtare kanë qenë jo vetëm pjesë e rregullave, për të gjitha vajzat konkurruese, pasi për Miss Kosova, veshja ishte një mënyrë ideale për të promovuar vlerat dhe historinë e Kosovës.

Ndërkaq, vajza shqiptare, Anxhela Martini, është shfaqur me një veshje të Victoria’s Secret me shqiponjën dykrenare. Por nuk ka mjaftuar kaq, pasi dy ditë më pas vajza shqiptare dhe një tjetër nga Irlanda janë bërë shkak për polemika. Kanë qenë fotot e tyre që janë bërë objekt debati, pasi të dyja vajzat shfaqen topless dhe të mbuluara vetëm me bojë. Kritikat kanë goditur direkt fotografin Fadil Berisha, i cili, sipas ABC-së, ka sjellë elemente nudizmi, duke anashkaluar bukurinë dhe zgjuarsinë e vajzave.

Ndërkohë, organizatorët e Miss Universe kanë reaguar duke theksuar se fotot e realizuara janë “të përsosura” dhe tregojnë dimensionet e secilës vajzë konkrete. Evenimenti më i madh i bukurisë botërore pritet të mbahet më 23 gusht, ku pritet të kurorëzohet edhe vajza më e bukur e universit, ku 2 prej konkurrenteve janë shqiptare.

Presidenti i Republikës, Prof. Dr. Bamir Topi dekoroi dje në mbrëmje tenorin e mirënjohur Kastriot Tusha me Urdhrin “Mjeshtër i Madh”, me motivacionin: “Për kontributin e dhënë në kulturën e artin shqiptar, nëpërmjet interpretimit me mjeshtëri si këngëtar lirik në muzikën klasike e në artin muzikor popullor dhe për veprimtari të veçantë në përgatitjen e artistëve të rinj.”
Zyra për shtyp e Presidentit bëri të ditur se me këtë rast, në ambientet e Amfiteatrit të qytetit të Durrësit u zhvillua dje në mbrëmje ceremonia e dekorimit, në të cilën ishin të pranishëm Zëvendësministrja e Turizmit, Kulturës, Rinisë dhe Sporteve, zonja Suzana Turku, Kryetari i Bashkisë së Durrësit, zoti Vangjush Dako, deputetë, autoritete shqiptare nga Mali i Zi dhe personalitete të tjera, artistë, kompozitorë, këngëtarë, etj.

Pas ekzekutimit të himnit kombëtar dhe leximit të dekretit presidencial nga Sekretari i Përgjithshëm, Aleksandër Flloko, Kryetari i Shtetit i dorëzoi Urdhrin e lartë zotit Kastriot Tusha, i cili, falenderoi plot emocion Presidentin Topi për mirënjohjen dhe vlerësimin maksimal që iu bë.

“Tusha, është një nga zërat më të bukur të muzikës shqiptare, një njeri, i cili gjatë karrierës së tij ka dëshmuar dhe vazhdon të dëshmojë që ka një diapazon të gjerë, një stil artistik, ndoshta duke qenë se ju sot keni marrë motiv nga Roma, siç i thonë italianët: një zë ‘incomfondibile’ – i papërzier, i padiskutuar me asnjë zë tjetër shqiptar. Unë dëshiroj të vlerësoj kontributin e zotit Tusha jo vetëm në nivel artistik, jo vetëm si një artist me diapazon të gjerë në muzikën klasike, në muzikën lirike, në muzikën popullore shqiptare, por edhe në atë të vendeve fqinje. Por besoj se kënaqësia më e madhe është që ai sot e meriton, edhe para miqve të tij, edhe para publikut titullin e lartë ‘Mjeshtër i Madh’. Dhe për këtë unë ju uroj zoti Tusha!”

Më pas në Amfiteatrin e qytetit të Durrësit, Presidenti i Republikës, së bashku me të pranishmit e ftuar dhe spektatorët e artdashësit e shumtë, ndoqën Koncertin recital “Një mbrëmje romane”, me pjesë të përzgjedhura klasike dhe bashkëkohore, të interpretuara me mjeshtëri nga tenori Tusha.

TIRANE - Në agjendën e turneut veror të këngëtarit Eros Ramazzotti, për herë të parë është edhe shteti më i ri në botë Kosova. Këngëtari italian ka rezervuar datën 30 korrik për koncertin e tij në Prishtinë që është parashikuar të zgjasë 2 orë e gjysmë.
Ramazzotti do të mbërrijë në Kosovë vetëm tre ditë pas koncertit në Palermo, për të “fluturuar më pas” drejt Cagliarit. Data e koncertit në Prishtinë tashmë është publikuar edhe në ueb – faqen zyrtare të këngëtarit.

Produksioni “Live Nation” i cili njihet për organizimin e koncerteve të këngëtarëve të famshëm, do të sjellë 48 kamionë me të gjitha pajisjet. Rreth 400 anëtarë të “Live Nation” do të përkujdesen për të gjitha detajet që kanë të bëjnë me koncertin.

Koncerti në Kosovë i Eros Ramazzottit, i cili është organizuar nga kompania e biznesit UBBOSS, është pjesë e turneut që këngëtari ka nisur vitin e kaluar.
Mësohet se 35 mijë bileta (që nuk do të kushtojnë më shumë se 15 euro) do të dalin në shitje në Kosovë, Shqipëri dhe Maqedoni, duke nisur nga data 9 korrik.

Eros Ramazzotti është kantautor italian i cili gjatë karrierës së tij 25-vjeçare ka realizuar 14 albume. Albumet e Ramazzottit janë shitur në mbi 50 milionë kopje. Ramazzotti është i njohur për bashkëpunimet e tij me këngëtarë si Tina Turner, Anastacia, Luciano Pavarotti, Laura Pausini, Ricky Martin etj.
(e.n/koha.net/BalkanWeb)

Dje është bërë ceremonia zyrtare për fillimin e realizimit të filmit të parë të animuar “ Molla e Kuqe 3”, që ka për autor dhe animator Mentor Berishën. Një artist i ri që për herë të parë do të sjellë risi në këtë zhanër kinematografik, që në bashkëpunim me Qendrën Kinematografike të Kosovës,

Ndërsa Zeqir Hamiti, drejtori i QKK-së, u shpreh se është një ide shumë e interesante e autorit Mentor Berisha ai ka bërë edhe zgjedhje të mirë për figurat dhe parabolën që përcjellë. Qendra Kinematografike e Kosovës e ka mbështetur këtë projekt me 15 mijë euro. Ndërkaq autori Mentor Berisha duke falënderuar për të pranishmit për pjesëmarrjen dhe QKK-në për mbështetjen, ekzekutoi disa nga momentet e caktuara.

Në qendër të filmit të animuar “Molla e kuqe 3”, është udhëtimi imagjinar i një krimbi, karakteri i të cilit është ndërtuar mbi bazën e vetive të gjindshmërisë dhe kureshtjes. Në shumë situata krimbi bën sjellje të çuditshme dhe të paparashikueshme, një personazh mjaft karakteristik, me syze e veti elastike. E gjithë jeta e këtij krimbi vërtitet brenda një molle të kuqe, për faktin se ajo i përgjigjet çdo asketi të tij. Deri në momentin që mollën e pret një thikë dhe gjysma përfundon në lavaman dhe nga ai moment krimbit i duhet të përballet me disa situata që natyrisht trembin dhe tronditin jetën e krimbit.

Ky nuk do të jetë një film i zakonshëm animues që ndërtohet në kompjuter, por një film që do të marrë jo më pak por pesë muaj punë dhe filmi do të zgjasë dhjetë minuta. Ky film ishte i pari fitues në kategorinë e filmave të animuar që u hapë për herë të parë nga QKK.

Sonte do të zhvillohet nata finale e Miss Shqipëria 2010 e cila mbahet në në Kalane e Gjirokastrës ku do jetë nata finale që do shpall dhe Missin më të bukur shqiptar për vitin 2010.

Në Miss Shqipëria 2010 marrin pjesë 32 vajza bukuroshe nga qytetet shqiptare, si Tirana, Prishtina, Vlora, Prizreni, Podgorica etj.

Fituesja e këtij edicioni të “Miss Shqipëria 2010” do të kurorëzohet si mbretëresha e bukurisë shqiptarët ku do të marrë pjesë direkt në konkursin ndërkombëtar “Miss Globe International 2010”.

Prezantuesit e “Miss Shqipëria 2010” do të jenë Artan Imami dhe Inis Gjoni, poashtu të ftuar janë shum këngtarë nga Italia dhe Greqia, këngëtar nga Shqipëria, si Eranda Libohova, Orinda Huta, Greta Heta, Stefi Prifti etj, Artan Imami dhe Inis Gjoni do jenë prezantuesit e Miss Shqiperia 2010. Në këtë përveç bukurosheve shqipëtare nuk do të mungojn edhe surprizat e kësaj natë./INA/

Në hapësirën e Galerisë së Arteve të Kosovës, sot do të hapet ekspozita personale e artistit, Zef Toçi. Ceremonia e hapjes starton në orën tetë të mbrëmjes ku artisti do të prezantojë punën e tij artistike. Zef Toçi, ka diplomuar në Fakultetin e Arteve të Bukura në Bruksel në vitin 1972, në klasën e prof. Georgina Iserbut. Ai vjen nga qyteti i Mitrovicës dhe kjo është një nga ekspozitat e tij të shumta, që ka realizuar në vend dhe jashtë vendit. Ekspozita me piktura, e artistit Toçi do të qëndrojë e hapur deri më dhjetë korrik, në Galerinë e Arteve të Kosovës.