Ballina SPORTI SHQIPTAR Drama e Vllaznisë bën lëmsh edhe Kategorinë e Parë, kush e zëvendëson...

Drama e Vllaznisë bën lëmsh edhe Kategorinë e Parë, kush e zëvendëson Vllazninë B?

11
0
SHPËRNDAJE

Se pari, Vllaznia nuk ka rënë ende, ndaj është herët për të nisur vajtimin. Megjithatë, disa llogari duhen bërë dhe klubi shkodran është shumë pranë humnerës. Nëse Vllaznia bie, lind një problem i paparashikuar për Federatën Shqiptare të Futbollit, sepse në rregullore nuk është shkruar askund çfarë ndodh me Vllazninë B.

Së pari, rregullorja e FSHF-së shkruan se Vllaznia B bie nga kategoria nëse Vllaznia A bie në të Parën. Deri këtu e qartë, por ajo që FSHF nuk e ka parashikuar është luajtja e ndeshjeve play-off pa përfunduar Superiorja.

Kjo do të thotë që Vllaznia B do të ndeshet me Orikumin të premten, por realisht a duhet luajtur ajo ndeshje? Sipas rregullores, Vllaznia B zbret nga kategoria nëse bie Vllaznia, ndaj ç’kuptim ka kjo finale me Orikumin?

Në vendet që lejojnë ekipet B të luajnë në futbollin profesionist, ekipi B zbret automatikisht në vendin e fundit në raste si ky i Vllaznisë B dhe për pasojë ekipi i vendit të fundit ngjitet një vend më sipër. Këtu përfiton realisht Tërbuni, që duhet të luajë kundër Orikumit në play-off.

Justifikimi që mund të përdorë FSHF është se Tërbuni doli i fundit në fushë dhe i takon të zbresë nga kategoria, por logjika thotë që nëse Orikumi humbet në fushë finalen kundër Vllaznisë B, pse qenka më i favorizuar se Tërbuni?

Material për gjyq, Tërbuni ka të drejtë të ankohet dhe FSHF ka bërë një autogol duke mos e shkruar në rregullore pse përfiton Orikumi dhe jo Tërbuni. Në këtë moment, i bie që Orikumi luan për qejf, sepse nëse bie Vllaznia A, finalja e së premtes nuk ka asnjë vlerë reale.

Zgjidhja është e thjeshtë: finalja play-off shtyhet derisa të mësohet fati i Vllaznisë A dhe nëse skuadra shkodrane bie, duhet konsultim me UEFA-n ose ndonjë nga rregulloret e shteteve që kanë ekipe B. Logjikisht i takon Tërbunit të kalojë Vllazninë B në renditje, ashtu si Mamurrasi ka zbritur i fundit në Kategorinë e Dytë dhe ka përfituar ekipi që është aktualisht i fundit në grup, duke mos zbritur nga kategoria.